පසුගිය නත්තලේදී තම මියගිය මවගේ නිවසේ අට්ටාලය පිරිසිදු කරන අතරතුර සහෝදරයන් තිදෙනෙක් පැරණි පුවත්පත් ගොඩක් යට ජීවිතය වෙනස් කරන සොයාගැනීමක් කළහ. එය මෙතෙක් නිර්මාණය කරන ලද පළමු සුපර්මෑන් විකට චිත්‍රකතා පොත් වලින් එකකි.
සුපර් මෑන්ගේ වික්‍රමාන්විතයන් පිළිබඳ 1939 ජුනි මාසයේ පළමු සංස්කරණයේ මුල් පිටපතක් වූ එය කැපී පෙනෙන ලෙස පිරිසිදු තත්ත්වයේ පැවතුනි. දැන් එය වෙන්දේසියේදී ඩොලර් මිලියන 9.12කට අලෙවි වූ අතර, මෙතෙක් අලෙවි වූ වැඩිම මිලකට අලෙවි වූ විකට පොත බවට පත්ව ඇත.
පසුගිය බ්‍රහස්පතින්දා (20) අලෙවිය පැවැත්වූ ටෙක්සාස් පදනම් කරගත් හෙරිටේජ් වෙන්දේසි සමාගම එය “විකට පොත් එකතු කිරීමේ උච්චතම අවස්ථාව” ලෙස හැඳින්වීය.
2024 දී සහෝදරයන් විසින් කාඩ්බෝඩ් පෙට්ටියක් තුළ තිබූ සුපර්මෑන් #1 ඇතුළු විකට පොත් හයක් සොයා ගත් බව හෙරිටේජ් පවසයි.
වෙන්දේසි ආයතනය හා සම්බන්ධ වීමට මෙම සහෝදරයින් මාස කිහිපයක් බලාසිට ඇත. ඊට පසු පළමු ඇමතුම ලැබුණ මොහොතේම Heritage Auctions උප සභාපති ලොන් ඇලන් සැන් ෆ්රැන්සිස්කෝ ජීවත් වූ මෙම සහෝදරයින් හමුවීමට ගිය බව වෙන්දේසි ආයතනය පවසයි.
“තම නම් හෙළි නොකිරීමට තීරණය කර ඇති සහෝදරයන් වයස අවුරුදු 50 සහ 60 ගණන්වල පසුවන අතර, ඔවුන්ගේ මව ඔවුන්ට මිල අධික විකට පොත් එකතුවක් ඇති බව පවසා තිබුණත් ඒවා කිසි විටෙකත් පෙන්නා නැතැයි” ඇලන් මහතා පවසයි.
මහා අවපාතය සහ දෙවන ලෝක යුද්ධයේ ආරම්භය අතර කාලය තුළ ඇය සහ ඇගේ සහෝදරයා ඒවා මිලදී ගත් දා සිට මෙම විකට පොත් ඉතා ප්‍රවේශමෙන් රැකගෙන සිට ඇති බව ඇලන් මහතා පවසයි.
පැරණි කඩදාසි කල් තබා ගැනීම සඳහා උතුරු කැලිෆෝනියාවේ සිසිල් දේශගුණය කදිම බව ඇලන් මහතා පැවසීය.
“එය ටෙක්සාස්හි අට්ටාලයක තිබුණා නම්, එය විනාශ වී යාමට ඉඩ තිබුණා,” ඔහු පැවසීය.
සුපර්මෑන් මුලින්ම හඳුන්වා දුන් 1938 කෘතිය වන Action Comics No. 1 පසුගිය වසරේ ඩොලර් මිලියන 6කට අලෙවි විය.
‘පෙට්ටිය අට්ටාලයේ පිටුපස අමතක වී තිබුණා’ යැයි බල සහෝදරයා පැවසූ බව වෙන්දේසි ආයතනය විසින් නිකුත් කරන ලද මාධ්‍ය නිවේදනයක සඳහන් විය.
ඔහු තවදුරටත් මෙසේ පැවසීය: “මෙය හුදෙක් පැරණි කඩදාසි සහ තීන්ත පිළිබඳ කතාවක් නොවේ. මෙය කිසි විටෙකත් එකතු කළ හැකි දෙයක් ගැන පමණක් නොවේ. මෙය මතකය, පවුල සහ අතීතය අප වෙත නැවත පැමිණෙන අනපේක්ෂිත ආකාරය පිළිබඳ සාක්ෂියකි.”
බීබීසී වාර්තාවක් ඇසුරිණි.
