වෘත්තීය අධ්‍යාපනය ආර්ථිකයට සෘජුවම දායක වන අතර එය ගෞරවනීය තේරීමක් ලෙස සැලකිය යුතු බව අග්‍රාමාත්‍ය ආචාර්ය හරිනි අමරසූරිය මහත්මිය පැවසුවාය.
ඇය පෙන්වා දුන්නේ වෘත්තීය අධ්‍යාපනය පාසල් අධ්‍යාපනයේ සිට උසස් අධ්‍යාපනය දක්වා පැහැදිලි මාවතක් සපයන අතර එය යහපත් අනාගතයකට මඟ පෙන්වන බවයි.
ඇය මේ බව ප්‍රකාශ කළේ නව රජයේ වෘත්තීය අධ්‍යාපන නියෝජ්‍ය අමාත්‍යවරයා ලෙස අභිනවයෙන් පත්වූ නලින් හේවගේ මහතා නාරාහේන්පිට නිපුණතා පියසේදී නිල වශයෙන් වැඩ භාරගැනීමේ උත්සවයට සහභාගි වෙමිනි.
වත්මන් රජයේ ඉහළම ප්‍රමුඛතාවයක් ලෙස අධ්‍යාපනය සැලකේ. අධ්‍යාපනය, උසස් අධ්‍යාපනය සහ වෘත්තීය අධ්‍යාපනය වෙනම විෂයයන් ලෙස සැලකුව ද, ඒවා බාධාවකින් තොරව එකට ක්‍රියා කළ යුතු සාකල්‍ය අධ්‍යාපන ක්‍රමයක අන්තර් සම්බන්ධිත සංරචක බව ද අග්‍රාමාත්‍යවරිය පෙන්වා දුන්නා ය.
“අපේ රජය වෘත්තීය අධ්‍යාපනය කෙරෙහි විශේෂ අවධානයක් යොමු කරනවා. එය පාරම්පරිකව දකින්නේ පසුබෑමකට ලක්වූ හෝ වෙනත් විකල්පවලට යොමුවීමට නොහැකි දරුවන්ගේ මාවතක් ලෙසයි. එම ආකල්පය වෙනස්විය යුතුයි. වෘත්තීය අධ්‍යාපනය ආර්ථිකයට සෘජුවම දායක වන සහ විය යුතු ක්ෂේත්‍රයක්. පාසල් අධ්‍යාපනයේ සිට උසස් අධ්‍යාපනය දක්වා දීප්තිමත් අනාගතයක් ලබා දෙන ගෞරවනීය තේරීමක්,” අගමැතිවරිය වැඩි දුරටත් පැවසුවාය.
