ශ්රී ලංකාව සහ නවසීලන්තය අතර පැවැත්වීමට නියමිත තරග 3 කින් සමන්විත පන්දුවාර විස්සයි-20 ක්රිකට් තරගාවලිය සඳහා නම් කරන ලද ශ්රී ලංකා කණ්ඩායමට ක්රීඩකයින් 16 දෙනෙකු ඇතුළත්ව සිටිති. සුපුරුදු පරිදි මෙම කණ්ඩායම චරිත් අසලංක විසින් මෙහෙයවනු ලබයි
ඉකුත්දා නවසීලන්තයට එරෙහිව පැවැති තරග 3 කින් සමන්විත පන්දුවාර විස්සයි-20 තරගාවලිය සඳහා ක්රීඩා කරන ලද කණ්ඩායමට ඇතුළත්ව සිටි තුන් ඉරියව් ක්රීඩක දුනිත් වෙල්ලාලගේ පමණක් මෙම කණ්ඩායමට නම් නොකර තිබීම කැපී පෙනෙයි. වෙල්ලාලගේ මංගල විස්සයි-20 තරගාවලිය බවට පත්වුණු එම තරගාවලිය 1-1 ක් ලෙස ජය පැරදුමෙන් තොරව නිමාවට පත්විය.කෙසේ වෙතත් නම් කරන ලද අනෙක් සියලුම ක්රීඩකයින් එම තරග සංචාරයට ඇතුළත්ව සිටින ක්රීඩකයින් වීම විශේෂත්වයක් වේ.
මෙම තරගාවලිය සඳහා ශ්රී ලංකා කණ්ඩායම කොටස් දෙකක් වශයෙන් නවසීලන්තය බලා පිටත්ව යනු ලබන අතර එහි එක් කාණ්ඩයක් මේ දෙසැම්බර් මස 20 වැනිදාද දෙවැනි කාණ්ඩය දෙසැම්බර් මස 21 වැනිදා රාත්රියේදීද පිටත්ව යෑමට නියමිතය. විස්සයි-20 තරග 3 ට අමතරව මෙම තරගාවලිය යටතේ තරග 3 කින් සමන්විත එක්දින තරගාවලියක්ද පැවැත්වීමට නියමිතය. තරගාවලිය ජනවාරි මස 12 වැනිදා අවසන් වනු ඇත.
පන්දුවාර විස්සයි-20 තරගාවලියෙන් ආරම්භ වන දෙරට අතර තරගාවලියේ පළමු තරග දෙක දෙසැම්බර් මස 28 සහ 30 වැනි දිනයන්හිදී ටෟරංගාහි බේ ඕවල් ක්රීඩාංගණයේ දී පැවැත්වෙනු ඇත. තෙවැනි තරගය 2025 වසරේ ජනවාරි 02 වැනිදා සැක්ස්ටන් ඕවල්හිදී පැවැත්වෙනු ඇත.
එම තරගාවලියෙන් පසුව පැවැත්වෙන තරග 3 කින් සමන්විත එක්දින තරගාවලිය ජනවාරි 05 වැනිදා වෙලිංටන්හිදී ආරම්භ වේ. එහි දෙවැනි සහ තෙවැනි තරග පිළිවෙළින් 08 වැනිදා සහ 11 වැනිදා හැමිල්ටන් සහ ඕක්ලන්ඩ්හිදී පැවැත්වෙනු ඇත.
ශ්රී ලංකා විස්සයි-20 කණ්ඩායම – චරිත් අසලංක (නායක), පැතුම් නිස්සංක, කුසල් මෙන්ඩිස්, කමිඳු මෙන්ඩිස්, භානුක රාජපක්ෂ, චමිඳු වික්රමසිංහ, වනිඳු හසරංග, මහීෂ් තීක්ෂණ, මතීෂ පතිරණ, නුවන් තුෂාර, අසිත ප්රනාන්දු, බිනුර ප්රනාන්දු, දිනේෂ් චන්දිමාල්, අවිශ්ක ප්රනාන්දු, ජෙෆ්රි වැන්ඩර්සේ, කුසල් පෙරේරා.
