තම පුතාගේ චිත්‍රපටය වන Loveyapa හි ට්‍රේලර් එළිදැක්වීමේ උත්සවයට අමීර් පැමිණ සිටි අතර එහිදී ඔහු දුම්පානය නතර කළ බව හෙළි කළේය. ඒ විතරක් නෙවෙයි මේ තීරණය ගන්න ඇත්තම හේතුව ගැනත් කතා කළා.
දැනට චිත්‍රපටවල රඟපෑමෙන් ඈත්ව සිටින අමීර් ඛාන් ඊයේ (10) හෙළි කළේ වසර ගණනාවක අධික දුම්පානයෙන් පසු තමා දුම්පානය නතර කළ බවයි. අමීර් ඔහුගේ පුත් ජුනයිඩ්ගේ Loveyapa චිත්‍රපටයේ ට්‍රේලර් එළිදැක්වීමේ උත්සවයට පැමිණ සිටි අතර එහිදී ඔහු එවැනි තීරණයක් ගැනීමට ඇති සැබෑ හේතුව හෙළි කළේය.
”මම දුම්පානය අත්හැරියා, දුම්පානය මම ගොඩක් කැමති දෙයක්. මම එය භුක්ති විඳින දෙයක්. මම මොනවා කියන්නද ?. ඒක තමයි ඇත්ත, මට බොරු කියන්න බැහැ. දුම්කොළ මම ප්‍රිය කරන දෙයක්, ඒක සෞඛ්‍යයට හොඳ නැහැ. කිසිවෙකු දුම්පානය නොකළ යුතුයි” ඔහු පැවසීය.
අමීර් දුම්පානය නතර කරන ලෙස ඉල්ලා සිටියි
දුම්පානය නතර කරන ලෙස ජනතාවගෙන් ඉල්ලා සිටි ඔහු, ”මම මේ නරක පුරුද්දෙන් ඉවත් වූ බව කියන්නේ සතුටින්‍ බොහෝ දෙනෙක් සවන් දී බලා සිටින බැවින්, මම ඔවුන්ටත් කියන්න කැමතියි. කරුණාකර මෙය අත්හරින්න, එය හොඳ පුරුද්දක් නොවේ, එය නොකළ යුතු දෙයක්” අමීර් වැඩි දුරටත් පැවසුවේ ය.
දුම්පානය නතර කිරීම පිටුපස ඇති සැබෑ හේතුව
එසේම, ඔහු දුම්පානය නතර කිරීමට තීරණය කළේ තම පුතා චිත්‍රපට ක්‍ෂේත්‍රයේ සිය වෘත්තීය ජීවිතය ස්ථාපිත කිරීමට සූදානම්ව සිටින අවස්ථාවක බව ඔහු පැවසීය.
“ඒ වගේම මගේ පුතාගේ චිත්‍රපටය එන්න ළඟයි. දුම්පානය නතර කරන්න සුදුසුම මොහොත ඒක කියලා මට හිතුණා. ඒ නිසා මම දුම්පානය නොකරන බවට සපථ කළා. ඒක වැඩ කළත් නැතත් තාත්තා කෙනෙක් විදියට මට මේ කැපකිරීම කරන්න ඕන වුණා,” අමීර් අවධාරණය කළේය.
දුම්පානය නතර කිරීම පිළිබඳව අමීර් කළ හෙළිදරව්ව ප්‍රේක්ෂකාගාරයෙන් මහත් ප්‍රීති ඝෝෂාවක් ඇති කළේය.
මේ අතර, ජුනයිඩ්ගේ ඉදිරි චිත්‍රපටය වන Loveyapa චිත්‍රපටයේද ප්‍රධාන චරිතයට Khushi Kapoor රංගනයෙන් දායක වේ. මෙම චිත්‍රපටය අධ්‍යක්ෂණය කර ඇත්තේ Advait Chandan විසින් වන අතර එය පෙබරවාරි 7 වෙනිදා ආදරවන්තයින්ගේ සතිය වෙනුවෙන් නිකුත් කිරීමට නියමිතය.
