පිරිමින් අතර දුම්පානය කිරීමේ ප්රතිශතය පහත වැටී ඇති නමුත් කාන්තාවන්ගේ දුම්පානය ඉහළ යමින් පවතින බව ළමා ශ්වසන රෝග පිළිබඳ විශේෂඥ වෛද්ය චානා ද සිල්වා පැවසීය.
මාධ්ය අමතමින් ඔහු කියා සිටියේ මිනිසුන්ට ආහාර හෝ ජලය නොමැතිව දින ගණනක් ජීවත් විය හැකි නමුත් හුස්ම ගැනීමකින් තොරව විනාඩි කිහිපයක් හෝ ජීවත් විය නොහැකි බැවින් ශ්වසන පද්ධතිය ඉතා වැදගත් බවයි.
මෙහිදී ශ්වසන රෝග පිළිබඳ විශේෂඥ වෛද්ය සමන්මලී දල්පතාදු පෙන්වා දුන්නේ නිදන්ගත බාධාකාරී පුඵ්ඵුසීය රෝග (Chronic Obstructive Pulmonary Disease – COPD) ගෝලීය වශයෙන් සිදුවන මරණ සඳහා හත්වන ප්රධානතම හේතුව බවයි.
කෙසේ වෙතත් මෙම රෝගය පිළිබඳව සමාජය තුළ නිසි අවබෝධයක් නොමැති බව ද ඇය පැවසුවාය.
“මෙම රෝගය ගෝලීය වශයෙන් වාර්තා වන මරණ වලින් 7 වැනි ප්රමුඛතම හේතුවයි. ප්රතිකාර නොකළ ඇදුම හෝ දුම්පානය හේතුවෙන් දශක ගණනාවක් තිස්සේ නොදැනුවත්ව ම මෙම රෝගය වර්ධනය වෙනවා. හුස්ම හිරවීම වැනි රෝග ලක්ෂණ සාමාන්යයෙන් වයස අවුරුදු 45 න් පසුව දිස් වෙනවා.” විශේෂඥ වෛද්යවරිය පැවසුවාය.
2017 අධ්යයනයකින් පෙන්නුම් කරන්නේ වයස අවුරුදු 40 ට වැඩි ශ්රී ලාංකිකයින්ගෙන් 10% කට COPD ඇති බවයි. ප්රධාන වශයෙන් අඩු දැනුවත්භාවය හේතුවෙන් මෙම තත්ත්වය වර්ධනය වී ඇත.
“වායු දූෂණයට නිරාවරණය වීම සහ මුඛ ආවරණ පැළඳීම නොසලකා හැරීම COPD සඳහා දායක වන ප්රධන සාධක වෙනවා. රෝග ලක්ෂණ අතර ඇවිදීමේ අපහසුතාව, හුස්ම හිරවීම සහ සෙම්ප්රතිශ්යාව වැනි සුළු රෝග සඳහා සංවේදීතාව දැකගත හැකියි. ඇදුම මෙන් නොව, COPD යනු නිදන්ගත රෝගයක්. එයට දිගු කාලීනව ප්රතිකාර අවශ්ය වන නිදන්ගත තත්වයක්’ විශේෂඥ වෛද්ය සමන්මලී වැඩි දුරටත් පෙන්වා දුන්නා ය.
