තව නොබෝ දිනකින් කොළඹදී අති උත්කර්ෂවත් ලෙස විවෘත කිරීමට නියමිත දකුණු ආසියාවේ පළමු ඒකාබද්ධ සංචාරක හෝටල් සංකීර්ණය වන City of Dreams Sri Lanka හි සමාරම්භක අවස්ථාවට විශේෂ ආරාධිත අමුත්තා වශයෙන් සුපිරි බොලිවුඩ් නළු ෂාරුක් ඛාන් සහභාගී වන බවට මීට පෙර දැනුම් දී තිබුණි. එහෙත් නොවැළැක්විය හැකි හේතුවක් මත ෂාරුක් ඛාන් එම සුවිශේෂී අවස්ථාවට සහභාගී නොවන බව නිවේදනය කර ඇත.
මේ සම්බන්ධයෙන් වැඩිදුරටත් අදහස් දැක්වූ City of Dreams Sri Lanka හි ප්‍රකාශකයකු සඳහන් කර සිටියේ නොවැළැක්විය හැකි හේතුවක් මත සුපිරි නළු ෂාරුක් ඛාන්ගේ සහභාගී නොවූවද දේශීය හා ජාත්‍යන්තර විශිෂ්ටත්වයන් ප්‍රදර්ශනය කරමින් නියමිත පරිදි මෙම සුවිශේෂී විවෘත කිරීමේ උත්සවය පැවැත්වීමට කටයුතු යොදා ඇති බවයි. විශේෂයෙන් ජාත්‍යන්තර තත්වයේ සේවාවක් ලබා ගැනීම සඳහා වන ශ්‍රී ලාංකේය ගමනාන්තය City of Dreams Sri Lanka බවට පත් කිරීම සඳහා ඔවුන් කැපවී කටයුතු කරන බවද එහිදී පවසා සිටියේය.
වැඩිදුරටත් අදහස් දක්වමින් ඔහු සඳහන් කළේ “ෂාරුක් ඛාන් සියැසින් දැකගැනීමට බොහෝ දෙනා ඉතා ආශාවෙන් සිටි බව අපි හොඳින්ම දන්නවා. ඒ අවස්ථාව උදා කර ගැනීමට නොහැකි වීම පිළිබඳව අපගේ කණගාටුව ප්‍රකාශ කර සිටිනවා. මෙතෙක් අප වෙත අඛණ්ඩ සහයෝගය ලබා දෙමින් අපගේ සාර්ථකත්වය වෙනුවෙන් කටයුතු කළ ෂාරුක් ඛාන් හට අපගේ කෘතඥතාව පල කරන අතරම නුදුරු අනාගතයේදී ඔහු City of Dreams Sri Lanka වෙත කැඳවාගෙන ඒමට බලාපොරොත්තු වනවා.” යනුවෙනි.
ෂාරුක් ඛාන් සහභාගී නොවීම පිළිබඳව ඔහුගේ නිල ඒජන්සි ආයතනය වන WizCraft විසින් පහත නිවේදනය නිකුත් කර ඇත:
“මීට පෙර සැලසුම් කර තිබුණද නොවැළැක්විය හැකි හේතුවක් මත ෂාරුක් ඛාන් City of Dreams Sri Lanka හි සමාරම්භක අවස්ථාවට සහභාගී නොවන බව කණගාටුවෙන් යුතුව අප ඔබට දැනුම් දී සිටිමු.”
ශ්‍රී ලංකාව සහ එහි සිටින රසික ජනතාව පිළිබඳව ශාරුක් ඛාන් දක්වන්නේ ඉමහත් ආදරයකි. ඒ නිසාම මෙම සුවිශේෂී උත්සවය වෙනුවෙන් සහභාගී වීමට ෂාරුක් ඛාන් ඉතා කැමැත්තෙන් පසු වූ බව රහසක් නොවේ. එහෙත් නොවැළැක්විය හැකි හේතුවක් මත එම අවස්ථාවට සහභාගී වීමට නොලැබීම පිළිබඳව සිය කණගාටුව පළ කරන ෂාරුක් ඛාන් City of Dreams Sri Lanka හි කළමනාකාරීත්වයට මෙන්ම තමන් වෙනුවෙන් බලා සිටි සියලු දෙනාට සිය හෘදයාංගම ස්තුතිය පුද කර සිටියි.
එමෙන්ම නුදුරු දිනයකදී City of Dreams Sri Lanka වෙත සපැමිණීමටද ෂාරුක් ඛාන් බලාපොරොත්තු වෙයි.
