නින්දේදී පිරිමින්ට ශුක්‍රාණු පිටවන විට, එය තෙත් සිහිනයක් ලෙස හැඳින්වේ. බොහෝ පිරිමින් කනස්සල්ලට පත්වන්නේ එය ශුක්‍රාණු දුර්වලතාවක හෝ වඳභාවයේ මුල් සලකුණක් ලෙස සලකන හෙයිනි.
නින්දේදී ශුක්‍රාණු පිටවීම සාමාන්‍ය සිදුවීමක් බව වෛද්‍යවරු පවසති.
ලෝක සෞඛ්‍ය සංවිධානය පවසන්නේ, පිරිමි ළමුන් වැඩිවියට පත්වන විට ඔවුන්ගේ ටෙස්ටොස්ටෙරෝන් මට්ටම ඉහළ යන බව සහ එමගින් නින්දේදී ශුක්‍රාණු පිටවන බව ය.
මේ ගැන විද්‍යාව සහ පර්යේෂණ පවසන්නේ කුමක් ද?
ලිංගික සිහින
‘ලිංගික සිහින, තෙත් සිහින සහ නිශාචර විමෝචනය’ යන මාතෘකාව යටතේ හොංකොංහි ෂු යෙන් විශ්වවිද්‍යාලය සිදුකළ අධ්‍යයනයක් මගින් නින්දේදී ශුක්‍රාණු පිටවීමට හේතුව කුමක් දැයි සොයා බලන ලදී.
අධ්‍යයනයට සහභාගි වූවන්ගෙන් 80%ක් පැවසුවේ, නින්දේදී ශුක්‍රාණු පිටවීමට හේතුව ලිංගික සිහින බව ය.
පාසල් සහ විශ්වවිද්‍යාල අධ්‍යාපනය ලබන තරුණ පිරිමි ලිංගික සිහින නිතර දකින බව සාමාන්‍යයෙන් විශ්වාස කළත්, අධ්‍යයනයේදී පෙනී ගියේ ඔවුන් වසරකට සාමාන්‍යයෙන් 9 වතාවක් පමණ ලිංගික සිහින දකින බව ය.
සිහින අපගේ දෛනික සිතුවිලි සහ ආශාවන් සමග සම්බන්ධ බවට ඇති පොදු විශ්වාසය මෙම අධ්‍යයනයෙන් ප්‍රශ්න කෙරේ.
ලිංගිකත්වය ජීවිතයේ වැදගත් කොටසක් වුව ද, එය සිහිනවල දක්නට ලැබෙන්නේ කලාතුරකින් බව අධ්‍යයනයෙන් පෙන්වා දෙයි.
“පිරිමි ශරීරය ස්වභාවිකව ම ශුක්‍රාණු නිපදවනවා. ලිංගික සංසර්ගය හෝ ස්වයං වින්දනය හරහා ශුක්‍රාණු පිටවීමක් සිද්ධ නොවුණා ම, ස්වභාවිකව නිපදවෙන ශුක්‍රාණු නින්දේදී ස්වයංක්‍රීයව පිට වෙනවා. මේක ස්වාභාවික ක්‍රියාවලියක්,” ලිංගික විද්‍යාඥ වෛද්‍ය කමරාජ් පවසයි.
“කාන්තාවන් ඔසප් වෙනවා වගේ ම පිරිමින් ද ශුක්‍රාණු පිට කරනවා. නමුත් බොහෝ මිථ්‍යාවන් ශුක්‍රාණු පුරුෂ ශක්තියට වැරදි ලෙස සම්බන්ධ කරන අතර එමගින් බොහෝ ව්‍යාජ විශ්වාසයන් ඇති කරනවා,” වෛද්‍ය භූපති ජෝන් පවසයි.
පිරිමින් වඳභාවයට පත්විය හැකි ද?
චීනයේ ටොංජි වෛද්‍ය විද්‍යාලයේ පර්යේෂකයින් විසින් ඇමෙරිකා එක්සත් ජනපදයේ ජාතික වෛද්‍ය පුස්තකාල වෙබ් අඩවියේ ප්‍රකාශයට පත් කරන ලද වාර්තාවක, පැහැදිලි කළ නොහැකි ශුක්‍රාණු පිටවීමක් ඇති පිරිමින්ගේ ශුක්‍රාණු සහ නිරෝගී පිරිමින්ගේ ශුක්‍රාණු සමග සංසන්දනය කර තිබිණි.
අවිඥානක ශුකාණු පිටවීම ලෙස හඳුන්වන මෙම තත්ත්වයේදී, වේගවත් ශුක්‍රාණු පිටවීමක් සිදු වුව ද, ශුක්‍රාණු පිටවීමේදී අපහසුතාවක් දැනෙයි.
මෙම තත්ත්වය පිරිමි වඳභාවයෙන් 72%කට වගකිව යුතු බවත්, අවිඥානක ශුක්‍රාණු පිටවීමේ ගැටලුවක් ඇති පිරිමින්ට ලිංගික සංසර්ගය සහ උත්තේජනය අතරතුර ශුක්‍රාණු පිටවීමේ අපහසුතාවක් ඇති නමුත් නින්දේදී ශුක්‍රාණු පිටවන බවත් අධ්‍යයනයෙන් කියැවේ.
නින්දේදී ශුක්‍රාණු පිටවීම සහ විශේෂ කම්පන උපකරණ (PVS සහ EEJ) භාවිත කරමින් අවිඥානක ශුකාණු පිටවීම සහිත පිරිමින් 91 දෙනෙකුගෙන් ශුක්‍රාණු එකතු කරන ලදී.
නිගමනයක් ලෙස, අධ්‍යයනයෙන් යෝජනා කරන්නේ, නින්දේදී ස්වභාවිකව ලබා ගන්නා ශුක්‍රාණුවල චලනය (30.6%) සහ හැඩය (61.4%) වෙනත් ක්‍රම මගින් ලබා ගන්නා ඒවාට වඩා ඉහළ බව ය.
අවිඥානකව ශුක්‍රාණු පිටවන පිරිමින්ට නින්දේදී ස්වභාවිකව මුදා හරින නිරෝගී ශුක්‍රාණු ඇති බව අධ්‍යයනයෙන් පෙන්නුම් කෙරේ.
නින්දේදී ශුක්‍රාණු පිටවන තත්ත්වය අවිනිශ්චිත බැවින්, පසුගිය මාස 3 තුළ නින්දේදී ශුක්‍රාණු පිටවීම අත්විඳ ඇති අයට සෑම රාත්‍රියක ම කොන්ඩම් එකක් පැළඳ ශුක්‍රාණු සාම්පලයක් ලබා ගැනීමට උපදෙස් දුන් බව අධ්‍යයනයෙන් කියැවේ.
ඇමෙරිකානු ප්‍රසව හා නාරිවේද වෛද්‍ය විද්‍යාලය විසින් ඉන්ටර්නෙට් ඔස්සේ ප්‍රකාශයට පත් කරන ලද අධ්‍යයනයකින්, මනෝ විද්‍යාත්මකව ශිෂ්ණය ඍජු වීමේ අක්‍රියතාවයෙන් පෙළෙන පිරිමින්ගේ නින්දෙන් පිටවන ශුක්‍රාණු තම සහකරුට සංසේචනය කිරීමේ හැකියාව පරීක්ෂා කරන ලදී.
නින්දෙන් ශුක්‍රාණු පිටවීමෙන් ලැබෙන ශුක්‍රාණු ගුණාත්මක භාවයෙන් වෙනස් විය හැකි නමුත්, විද්‍යුත් ශුක්‍රාණු පිටවීම හෝ ශුක්‍රාණු එකතු කිරීම සඳහා සැත්කම් වැනි වේදනාකාරී ක්‍රම වළක්වා ගනිමින් කෘත්‍රිම සිංචනය සඳහා එය භාවිත කළ හැකි බවත් අධ්‍යයනයෙන් කියැවේ.
“අවුරුදු 12ක පිරිමි ළමයින්ගේ සිට වැඩිහිටියන් දක්වා ඕනෑ ම කෙනෙකුට නින්දේදී ශුක්‍රාණු පිටවිය හැකි යි. මේ ආකාරයෙන් ශුක්‍රාණු පිටවීමෙන් පිරිමියෙකු වඳභාවයට පත් වන බව හෝ ශුක්‍රාණු ප්‍රමාණය අඩු බව පැවසීම විද්‍යාත්මක නැහැ. ශුක්‍රාණු පිටවීමෙන් පසු ශරීරය නව ශුක්‍රාණු නිපදවනවා. නින්දේදී හෝ ස්වයං වින්දනයේ යෙදීම සරුභාවයට බලපාන්නේ නැහැ,” කමරාජ් පවසයි.
නින්දේදී ශුක්‍රාණු පිට වන්නේ ඇයි?
“පුද්ගලයෙකු නිපදවන ශුක්‍රාණු ගබඩා කරනු ලබන්නේ ශුක්‍රාණු කුටීරය ලෙස හඳුන්වන ප්‍රදේශයක. ශුක්‍රාණු නිපදවීමේ වේගය පුද්ගලයාගෙන් පුද්ගලයාට වෙනස් වෙනවා. ජල ටැංකියක් පිරී ඇති විට ජලය පිටතට ගලා යනවා සේ ම, ශුක්‍රාණු පිටවීම ද සිදුවනවා,” භූපති ජෝන් පවසයි.
නින්දේදී ශුක්‍රාණු පිටවීම යනු ගැටලුවක් ලෙස අදහස් නොකරන බව කමරාජ් පවසයි.
“බොහෝ අධ්‍යයනයන් තිබියදීත්, නින්දෙන් ශුක්‍රාණු පිටවීමට හේතු සම්පූර්ණයෙන් වටහාගෙන නැහැ. පුද්ගලයෙකු ලිංගිකත්වය ගැන සිහින දකින විට හෝ ඇඳ ඇතිරිලිවල අහම්බෙන් ශාරීරික උත්තේජනයක් අත්විඳින විට ඒවා සිදුවිය හැකි යි. මේක ශාරීරික ශක්තිය අඩු කරන බවට හෝ ලිංගික සංසර්ගයට අහිතකර ලෙස බලපාන බවට කිසිදු සාක්ෂියක් නැහැ.”
“ශුක්‍රාණු පිටවීම, ස්වයං වින්දනය හෝ නින්ද පවා කෙසේ හෝ ශුක්‍රාණු පිටවීමට හේතු වෙනවා. ඇත්ත වශයෙන් ම, මෙයින් පෙන්නුම් කරන්නේ ශරීරය සාමාන්‍ය තත්ත්වයක පවතින බව,” කමරාජ් පවසයි.
source:bbc.com/sinhala
