පසුගිය දා ඩිජිටල් ආර්ථික අමාත්‍යාංශයේ පැවති විශේෂ හමුවකින් අනතුරුව මෙටා සමාගම විසින් ශ්‍රී ලංකාවේ යොවුන් ඉන්ස්ටග්‍රෑම් ගිණුම් සඳහා දෙමාපිය අධීක්ෂණ යෙදවුම සක්‍රීය කිරීම පිළිබඳව නිවේදනය කළේය. මෙම හමුව ඩිජිටල් ආර්ථික නියෝජ්‍ය අමාත්‍ය එරංග වීරරත්න මහතාගේ ප්‍රධානත්වයෙන් පැවැත්විණි.
මෙටා කණ්ඩායම විසින් ඉන්ස්ටග්‍රෑම් යොවුන් ගිණුම් අධීක්ෂණ සඳහා වන යෙදවුම, මඟින් තම දරුවන්ගේ ඉන්ස්ටග්‍රෑම් ක්‍රියාකාරකම් පිළිබඳ වැඩි අධීක්ෂණයක් දෙමාපියන්ට ලබා දෙන යෙදවුමක් වේ. මෙම නව විශේෂාංගය වයස අවුරුදු 13 සිට 17 දක්වා ළමුන් සඳහා නිර්මාණය කර ඇති අතර, එමඟින් බුද්ධිමය පාලන කට්ටලයක් ඔස්සේ ආරක්ෂිත ඩිජිටල් පරිසරයක් නිර්මාණය කිරීමට දෙමාපියන්ට සහ භාරකරුවන්ට හැකියාව ලබා දෙයි.
මෙහි ඇති ප්‍රධාන විශේෂාංග අතරට, ප්‍රවේශය පූර්ව අනුමත සම්බන්ධතා වලට සීමා වීම, සීමිත පණිවිඩකරණ හැකියාව, සංවේදී අන්තර්ගතයන්ට ප්‍රවේශය පිළිබඳ දෙමාපියන්ගේ පාලනය, අන්තර්ක්‍රියා සීමාවන් පවත්වා ගැනීමේ හැකියාව, දෛනික තිර කාල සීමාවන් සැකසීමේ හැකියාව අයත් වේ.
දෙමාපිය අධීක්ෂණය සහිත ඉන්ස්ටග්‍රෑම් යොවුන් ගිණුම් හඳුන්වාදීම, ශ්‍රී ලංකාවේ තරුණ පරිශීලකයින් සඳහා මාර්ගගත ආරක්ෂණ ගැටළු විසඳීමේ සුවිශේෂී ඉදිරි පියවරක් ලෙස පෙන්වා දිය හැකිය. දෙමාපියන්ට සහ භාරකරුවන්ට ආරක්ෂිත සහ වයසට ගැළපෙන සමාජ මාධ්‍ය අත්දැකීමක් සිය දරුවන්ට ලබාදීමට අවශ්‍ය කරන පහසුව මෙමඟින් ලබා දෙයි. මෙම දෙමාපිය අධීක්ෂණ හැකියාව නුදුරුදීම Facebook සහ Messenger වැනි අනෙකුත් සමාජ මාධ්‍ය වේදිකා වෙතද හඳුන්වා දෙන බව Meta ආයතනය නිවේදනය කළේය.
එමෙන්ම මෙම සාකච්ඡාව අතරතුරදී, ශ්‍රී ලංකාවේ ඩිජිටල් පරිවර්තන ගමන කෙරෙහි විශේෂ අවධානයක් යොමු කළ අතර අන්තර්ජාල පාලනයේ ජාත්‍යන්තර ප්‍රමිතීන්ට අනුකූල වීමේ වැදගත්කම සහ ශ්‍රී ලංකාවේ දත්ත ආරක්ෂණ රාමුව ඉදිරියේදී ක්‍රියාත්මක කිරීම සම්බන්ධයෙන්ද අමාත්‍යාංශය සහ මෙටා ආයතනය අවදානය යොමු කළේය.
දකුණු සහ මධ්‍යම ආසියාව සඳහා Meta හි මහජන ප්‍රතිපත්ති අධ්‍යක්ෂක සරීම් අසීස් මහතා පෙන්වා දුන්නේ, කෘතිම බුද්ධිය සඳහා මෙටා සමාගමේ වැඩපිළිවෙළ පෙන්වා දුන් අතර Al යටිතල පහසුකම් සංවර්ධනය සඳහා ඇමරිකානු ඩොලර් බිලියන 75 ක ගෝලීය ආයෝජනයක් සිදු කර ඇති බවත් සඳහන් කළේය.
Meta හි විවෘත මූලාශ්‍ර භාෂා ආකෘතිය වන Llama, ගෝලීය වශයෙන් බාගත කිරීම් බිලියන 1.2 ඉක්මවා ඇති බවත්, දැනට බිලියනයකට අධික පරිශීලකයින් Meta Al ඔස්සේ ක්‍රියාත්මක වන විශේෂාංග නොමිලේ ලබා ගන්නා බවත් ඔහු තවදුරටත් පෙන්වා දුන්නේය.
මෙම අවස්ථාව සඳහා ඩිජිටල් ආර්ථික අමාත්‍යාංශ උපදේශක සුමුදු රත්නායක මහතා; Meta හි මධ්‍යම ආසියාව සහ ශ්‍රී ලංකාව සඳහා රාජ්‍ය ප්‍රතිපත්ති ප්‍රධානී සෙනුර අබේවර්ධන මහතා; Meta හි දකුණු ආසියාවේ රාජ්‍ය ප්‍රතිපත්ති සහකාර කළමනාකරු ටෙහාරා පුංචිහේවා මහත්මිය; ඇතුළු පිරිසක් සහභාගී වූහ.
