ශ්‍රී ලංකාවේ දේශීය වෙළඳපොළට නීති විරෝධී රසකැවිලි නිෂ්පාදන ඇතුළු වීම ඉහළ යාම නීත්‍යානුකූල ව්‍යාපාරවලට සැලකිය යුතු අභියෝග එල්ල කරන අතර පාරිභෝගිකයින්ට ද සෞඛ්‍ය අවදානම් ඇති කරන බව CBL Foods International ප්‍රධාන විධායක නිලධාරී සහ අධ්‍යක්ෂ කමල් ගීගනගේ පවසයි.
රටේ සෑම ප්‍රදේශයකම නීති විරෝධී රසකැවිලි නිෂ්පාදන බහුලව අලෙවි වන බැවින් වෙළඳපොළ ක්‍රමයෙන් “තර්ජනයට ලක්වෙමින් පවතින බව ද CBL වැඩි දුරටත් පෙන්වා දෙයි.
“මෙම නිෂ්පාදන බොහොමයක් කල් ඉකුත් වී ඇති අතර මූලික පෝෂක අන්තර්ගතය පවා නැහැ. රජයේ ප්‍රමිතීන්, රෙගුලාසිවලට අනුකූලව සහ බදු ගෙවීමෙන් නීතිමය හා සදාචාරාත්මකව බැඳී ඇති ව්‍යාපාරවල නියැලී සිටින අප වැනි සමාගම්වලට මෙය ප්‍රධාන අභියෝගයක් බවට පත්වෙමින් තිබෙනවා, ඒ වගේම පාරිභෝගිකයින්ට සෞඛ්‍ය අවදානම් ද ඇති කරනවා,” කමල් ගීගනගේ පැවසීය.
මෙම නීති විරෝධී රසකැවිලි නිෂ්පාදන ප්‍රධාන වශයෙන් ගමන් මලු හරහා රට තුළට ඇතුළු වන අතර, ගැටලුවේ පරිමාණයෙන් පෙන්නුම් කරන්නේ වෙනත් නීති විරෝධී මාර්ග ද භාවිතා වන බවයි.
“නීති විරෝධී ලෙස රට තුළට ගෙන එන ආහාර ද්‍රව්‍යවලට එරෙහිව නීතිය ක්‍රියාත්මක කරන ලෙස අපි රජයේ බලධාරීන්ගෙන් නැවත නැවතත් ඉල්ලා සිටිනවා. ව්‍යාපාර කිරීමට ශ්‍රී ලංකාවට පැමිණෙන ජනතාවට අපි ගරු කරනවා. නමුත් එය නීත්‍යානුකූල ආකාරයකින් කළ යුතුයි.”
ශ්‍රී ලංකාවේ සෞඛ්‍ය අමාත්‍යාංශය සහ පාරිභෝගික කටයුතු අධිකාරිය විසින් හඳුන්වා දී ඇති නවතම ලේබල් කිරීමේ සහ වෙළඳ දැන්වීම් රෙගුලාසි පිළිබඳව ද ඔහු අදහස් දැක්වීය.
“මෙම අවශ්‍යතාවය සම්බන්ධයෙන් සෞඛ්‍ය අමාත්‍යාංශය සහ අදාළ පාර්ශවයන් අතර පසුගිය වසර දෙක තුනක කාලය තුළ සාකච්ඡා වෙමින් පවතිනවා. අවසානයේදී, රට තුළ ඇසුරුම් කළ ආහාර ලේබල් කිරීම සහ ප්‍රචාරණය කිරීම සඳහා නව නීති මාලාවක් තීරණය කරන තැනකට එය ළඟා වුණා. වෙනස් කළ යුතු දේ පිළිබඳව ද අපි අපගේ යෝජනා ඉදිරිපත් කර තිබෙනවා. සමස්ත කර්මාන්තය ආරක්ෂා කිරීම සහ පාරිභෝගිකයින් ආරක්ෂා කිරීම සම්බන්ධයෙන් සමහර ක්ෂේත්‍රවල අපි කටයුතු කරමින් සිටිනවා” ඔහු පැවසීය.
ඇසුරුම්කරණ වෙනස්කම් සම්බන්ධයෙන් රජය යම් යම් සහන ලබා දුන්න ද, පවතින ඇසුරුම් තොග සම්පූර්ණයෙන්ම භාවිතා කිරීමට සහ මූල්‍ය පාඩු වළක්වා ගැනීමට දිගු සංක්‍රාන්ති කාලයක් තිබීමෙන් ව්‍යාපාරවලට ප්‍රතිලාභ ලැබෙනු ඇති බව ගීගනගේ සඳහන් කළේය.
“අද රට පත්ව ඇති තත්ත්වය තුළ, බොහෝ ව්‍යාපාරවලට එවැනි වියදම් අලාභයක් ලෙස කපා හැරීමට නොහැකි වී තිබෙනවා. එවැනි ද්‍රව්‍ය සම්පූර්ණයෙන්ම අවසන් වූ පසු සමාගම්වලට නව රෙගුලාසිවලට ඇතුළු වීමට ඉඩ දුන්නේ නම් එය බොහෝ සෙයින් යහපතක් වන බවයි අපගේ අදහස”
මූලාශ්‍රය – daily mirror.lk
