පැය 40ක් සතියකට දින පහක් ලෙස බෙදා වැඩ කිරීම අපගේ 21 වන සියවසේ ජීවන රටාවන්ට වඩ වඩාත් පටහැනි වෙමින් පවතී, විශේෂයෙන් පර්යේෂණවලින් පෙන්නුම් කරන්නේ අඩු කරන ලද පැය ගණන සේවකයාගේ මානසික සෞඛ්‍යය වැඩි දියුණු කරන බවයි.
දින හතරක වැඩ සතියක් අත්හදා බලමින් සිටින සමාගම් සමූහයක් සිය ආදායම වර්ධනය කර ගෙන ඇති බව ඔක්ස්ෆර්ඩ් විශ්වවිද්‍යාලය සිය නවතම අධ්‍ය්‍යනයක් මඟින් හෙළි කර ඇත.
කෙටි වැඩි සතියක සේවක යහපැවැත්මට ඇති බලපෑම තේරුම් ගැනීම පහසු වුව ද, සමාගමේ ඉපැයීම් සහ ඵලදායිතාවයට ඇති ධනාත්මක බලපෑම් වඩාත් පුදුමයට කරුණක් විය හැකි බව ද මෙම වාර්තාව වැඩි දුරටත් පෙන්වා දෙයි.
මෙම සමාගම් ලාභ නොලබන 4 Day Week Global විසින් සංවිධානය කරන ලද අත්හදා බැලීමකට සහභාගී වී ඇත. සමාගම් 33ක් සහ සේවකයින් 1,000කට ආසන්න සංඛ්‍යාවක් සම්බන්ධ වූ දින හතරක වැඩ කරන සතියේ අත්හදා බැලීමේදී සේවකයින්ට කිසිදු වැටුප් පාඩුවක් සිදු නොවූ අතර 4 Day Week Global විසින් ඔවුන්ගේ කාලයෙන් සියයට 80ක් සඳහා ඔවුන්ගේ වැටුපෙන් සියයට 100ක් ගෙවීය. නමුත් සේවකයින් කෙටි වැඩ කරන සතිය තුළ ඔවුන්ගේ සුපුරුදු උත්සාහයෙන් සියයට 100 ක් වැය කිරීමට ද පොරොන්දු විය.
මේ ආකාරයේ උපාය මාර්ගයක් නවයේ සිට පහ දක්වා කාර්යාල රැකියා සඳහා පමණක් ක්‍රියාත්මක නොවේ.
2015 සහ 2019 අතර කාලය තුළ රෝහල්, පාසල් සහ සමාජ සේවා සේවකයින් ඇතුළත් යෝජනා ක්‍රමයක් යටතේ අයිස්ලන්තය අඩු කළ වැඩ කරන පැය ගණන අත්හදා බැලීය. අයිස්ලන්තය එය “අතිමහත් සාර්ථකත්වයක්” ලෙස සැලකූ අතර වැටුප් අඩු කිරීමකින් තොරව පැය ගණන අඩු කිරීම එතැන් සිට අයිස්ලන්තයේ ශ්‍රම බලකායෙන් සියයට 86කට ලබා දී ඇත.
ඉතිහාසය පුරාම අපගේ වැඩ කිරීමේ රටාවන් දවසේ අභියෝගවලට අනුවර්තනය වී ඇත. එය කාර්මික රෙදි වියන යන්ත්‍රයක වැඩි කාලයක් වැඩ කිරීම හෝ මැකී යන දිවා කාලයේ ඵලදායිතාවය වැය කිරීම සඳහා ගොවියෙකු තම පැය ගණන මාරු කිරීම හෝ විය හැකිය.
Henry Ford ඔහුගේ කර්මාන්තශාලාවලට දින දෙකක “සති අන්තය” හඳුන්වා දී සියවසකට ආසන්න කාලයක් ගතවී ඇතත් කර්මාන්තය කුමක් වුවත්, බොහෝ ජාතීන් තවමත් පැය 40ක සතියක් දින පහක් වැඩ කිරීමට බෙදා ඇත. මෙම වැඩ කිරීමේ ක්‍රමය අපගේ 21 වන සියවසේ ජීවන රටාවන්ට වඩා බොහෝ සෙයින් පටහැනි වේ.
දින 4ක සති ගෝලීය නියමු වැඩසටහනේ නවතම සොයා ගැනීම් අනුව, අඩු කරන ලද පැය ගණන සේවකයින්ගේ මානසික සෞඛ්‍යය සහ ඔවුන්ගේ ඵලදායිතාව ඉහළ නංවන බව පෙන්වන වැඩ රටා පිළිබඳ අඛණ්ඩ පර්යේෂණවලට අනුකූල වේ. ගමනාගමන අඩු කිරීමෙන් කාබන් විමෝචනය අඩු කිරීම සහ මුදල්මය වශයෙන් පමණක් නොව අපගේ ජීවිත ඇගයීමට පදනම සැපයීම වැනි වෙනත් ප්‍රතිලාභ ද එය ගෙන එයි.
ආතතියෙහි විශාල වැඩිවීමක්
1970 ගණන්වල සිට විශාල ආර්ථික වර්ධනයක් සිදු වුව ද කම්කරුවන් සඳහා කාලය නිදහස් කිරීම සම්බන්ධයෙන් ඉතා සුළු ප්‍රගතියක් ලබා ඇති නමුත් නරකම දෙයක් ද සිදුවෙමින් පවතී, එනම්, සමහර අවස්ථාවල දී මෙම ප්‍රවණතාවය ආපසු හැරවීමට පටන් ගෙන ඇත. උදාහරණයක් ලෙස ඇමරිකානුවන් දැන් 2000 දී කළාට වඩා වැඩි පැය ගණනක් වැඩ කරති.
එය සේවක යහපැවැත්මට සහ මානසික සෞඛ්‍යයට හානි කිරීමට පටන් ගෙන තිබේ. පසුගිය සියවස තුළ බොහෝ ගුණයකින් ඵලදායී වීම (තාක්ෂණයට ස්තූතිවන්ත වන්නට) යන්නෙන් අදහස් වන්නේ අතීතයට වඩා දින පහක වැඩ සතියකදී අපගේ මිනිස් මොළයට බොහෝ දේ සැකසීමට සිදුවන බව වටහා ගැනීමට එතරම් දෙයක් අවශ්‍ය නොවේ. මෙය ආතතිය, කාංසාව සහ දැවීම විශාල ලෙස වැඩි වීමට හේතු වී තිබේ.
මෙය ජාතික සෞඛ්‍ය සේවාවන්ට සහ පවුල්වලට විශේෂයෙන් දැඩි ලෙස බලපායි. නමුත් සේවා යෝජකයින් ද පිරිවැය දරයි, ගණකාධිකාරී සමාගමක් වන Deloitte ඇස්තමේන්තු කර ඇත්තේ මානසික සෞඛ්‍ය ගැටලු සඳහා සේවා යෝජකයින්ට වාර්ෂිකව සිදුවන පිරිවැය එක්සත් රාජධානියේ පමණක් ඇමරිකානු ඩොලර් බිලියන 55ක් බවයි. මෙය බොහෝ දුරට සිදුවන්නේ නොපැමිණීම හෝ වඩාත් නරක “ප්‍රසවවාදය / presenteeism” නිසා ය. එහිදී පුද්ගලයෙකු ශාරීරිකව රැකියාවේ සිටින නමුත් අසනීප බවක් දැනෙන නිසා ඔහු ඵලදායී ලෙස රැකියාවේ නිරත නොවේ.
එක්සත් රාජධානියේ ජාතික සංඛ්‍යාලේඛන කාර්යාලය ඇස්තමේන්තු කර ඇත්තේ 2021 සහ 2022 කාලය තුළ එක්සත් රාජධානියේ ආතතිය, මානසික අවපීඩනය හෝ කාංසාව හේතුවෙන් සේවක දින මිලියන 17ක් අහිමි වී ඇති බවයි. අනෙකුත් බොහෝ ධනවත් රටවල ද එම ප්‍රවණතා දක්නට ලැබේ.
පැය අඩුයි, ඵලදායිතාව වැඩියි
ඇත්ත වශයෙන්ම සමාගම් ප්‍රධානීන් මෙසේ සිතනු ඇත, “මගේ සේවකයින් සියයට 20ක් අඩුවෙන් වැඩ කරන්නේ නම්, නිසැකවම නිෂ්පාදනයත් පහත වැටෙනු ඇත?”
නමුත් අධ්‍යයන කිහිපයකින්ම එය එසේ නොවන බව පෙන්වා දී ඇත. ඇත්ත වශයෙන්ම, අවම පැය ගණනක් වැඩ කරන රටවල් බොහෝ විට පැයක පදනම මත වඩාත්ම ඵලදායී වේ.
ඩෙන්මාර්කය, නෝර්වේ සහ නෙදර්ලන්තය වැනි මෙම රටවල් ද සතුටින්ම සිටිති. එක්සත් ජනපදය සහ එක්සත් රාජධානිය සාමාන්‍යයෙන් වසරකට පැය 1800ක් පමණ වැඩ කරන විට, සියලුම රටවල් සාමාන්‍යයෙන් වසරකට පැය 1400කට වඩා අඩුවෙන් වැඩ කරති.
බ්‍රිතාන්‍ය ටෙලිකොම් සමඟ සහයෝගයෙන් මා කළ පර්යේෂණය, අඩු පැය ගණනක් වැඩ කිරීම අනිවාර්යයෙන්ම ප්‍රතිදානයේ / output සමාන පාඩුවක් අදහස් නොකරන්නේ මන්දැයි පැහැදිලි කිරීමට උපකාරී වේ. සතිපතා ඵලදායිතාවයට සතිය තුළ හොඳ හැඟීමක් ඇතිවීමේ ධනාත්මක බලපෑම පෙන්වීමට අපට හැකි විය. සේවකයින් සතුටින් සිටින විට පැයකට වැඩි විකුණුම් සහ වැඩි ඇමතුම් පිළිබඳ සාක්ෂි අපට හමු විය.
අපගේ පර්යේෂණ මත පදනම්ව, දින 4 සතියේ නියමු වැඩසටහන් වලින් ලැබෙන වැඩ-ජීවිත සමතුලිතතාවයේ වෙනස්කම් සහ යහපැවැත්මේ වැඩිදියුණු කිරීම් ඵලදායිතාවයේ සියයට 10කින් පමණ වැඩිවීමට හේතු විය හැකි බව අපි විශ්වාස කරමු.
ඇත්ත වශයෙන්ම, පුද්ගල ඵලදායිතාවයේ සියයට 10ක වැඩිවීමක් දිනකට අඩුවෙන් වැඩ කරන සේවකයින්ට ක්ෂණිකව වන්දි ලබා නොදෙනු ඇත. නමුත් මෙම ඵලදායිතා වාසි කෙටි වැඩ සතියක් දක්වා මාරුවීමේ පිරිවැය අඩු කරනු ඇත.
එබැවින් මෙම වෙනසට සහාය වීම සඳහා රජයෙන් සහ ව්‍යාපාරවලින් ආයෝජන සහ සහනාධාර තවමත් අවශ්‍ය විය හැකි නමුත්, එසේ කිරීමෙන් මිනිසුන්ට සහ පෘථිවියට බොහෝ දේ ලබා ගත හැකිය.
කාලය, අපගේ වටිනාම වෙළඳ භාණ්ඩය
ඵලදායිතාව සහ යහපැවැත්මට අමතරව, දින හතරේ සතියේ ප්‍රතිලාභ පිළිබඳව වඩාත් පරිපූර්ණ ලෙස සිතීම ද වැදගත් වේ.
කෙටි සතියක් ගමන් බිමන් අඩු කිරීමෙන් එක්සත් රාජධානියේ කාබන් පියසටහන පවා අඩු කළ හැකිය. ( මෙහිදී බොහෝ අය සංචාරය නොකරනු ඇතැයි හෝ නිවාඩු දිනයේ සැලකිය යුතු ලෙස අඩුවෙන් ගමන් කරනු ඇතැයි උපකල්පනය කෙරේ). කාන්තාවන් යහපැවැත්මේ විශාලතම වැඩිවීම වාර්තා කරන බව නියමුවන් යෝජනා කරන බැවින්, දින හතරක සතියක් ස්ත්‍රී පුරුෂ සමානාත්මතාවයට ද ධනාත්මක බලපෑමක් ඇති කළ හැකිය.
දින හතරක සතියේ විවාදය ආර්ථික විද්‍යාඥයින් අතර අඛණ්ඩ සාකච්ඡාවක මතුපිට ද සීරීමට ලක් කරයි. දළ දේශීය නිෂ්පාදිතය දිගු කලක් තිස්සේ ජාතියක ප්‍රගතිය මනින අවසාන මිනුම ලෙස භාවිතා කර ඇති අතර, බොහෝ විට ප්‍රතිපත්ති සම්පාදකයින් ඕනෑම වියදමක් දරා වර්ධනය පසුපස හඹා යන ආකාරය දැකීමේ බලපෑම ඇත. නමුත් රටක් එහි දළ දේශීය නිෂ්පාදිතයට වඩා බොහෝ සෙයින් වැඩි ය.
දින හතරක වැඩ සතියක් ක්‍රියාත්මක කිරීමට ගත් උත්සාහයන්ගේ සාර්ථක ප්‍රතිඵල දැකීමෙන්, ව්‍යාපාරික සහ ප්‍රතිපත්ති නායකයින්ට දළ දේශීය නිෂ්පාදිතයේ සමහර ලාභ අපගේ වටිනාම භාණ්ඩය වන අපගේ කාලය අනුව නැවත බෙදා හැරීමට ඒත්තු ගැන්විය හැකිය. දැන් එය සැබෑ ප්‍රගතියක් ලෙස සැලකිය හැකිය.
මෙම ලිපියයේ කර්තෘ ජෑන්-එම්මානුවෙල් ඩි නෙව් / Jan-Emmanuel De Neve යනු ඔක්ස්ෆර්ඩ් විශ්ව විද්‍යාලයේ ආර්ථික විද්‍යාඥයෙකු සහ මහාචාර්යවරයෙකු වන අතර ඔහු Wellbeing Research Centre මෙහෙයවයි.
https://www.channelnewsasia.com/commentary/4-day-work-week-mental-health-productivity-trial-3117961
