ආබාධිත නිසා ලිංගික සම්බන්ධතා පැවැත්විය හැකිදැයි කෙනෙකු හොලීගෙන් ප්‍රශ්න කරන විට ඇගේ වයස යන්තම් අවුරුදු 16ක් වූවා පමණි. වසර ගණනාවක් පුරා ඇය වෙත තවත් එවැනි ප්‍රශ්න ගණනාවක් යොමු වුණු අතර, ඒවා අතර ඇයට “රෆ් සෙක්ස් කරන්න පුළුවන් ද” නැත්නම් ලිංගිකව හැසිරීම රෝද පුටුවේ සිටියදී සිදු කළ යුතු ද වැනි ප්‍රශ්න ද විය.
“මිනිස්සු හිතන්නේ එයාල කරන්නේ උදව්වක් කියලා, කැපකිරීමක් වගේ. නරක ම දේ තමයි, මට ඒ ගැන පුදුමයක් දැනෙන්නේ නැති එකයි, ඒ ගැන අවුලක් දැනෙන්නේ නැති එකයි.”
මේ වන විට 26 හැවිරිදි වියේ පසුවන හොලීට කලක් තිස්සේ ශරීරියේ වේදනාවක් පවතින අතර ඇය හයිපර්මොබිලිටි සින්ඩ්‍රෝමයෙන් ද පීඩා විඳියි. එමෙන් ම ඇය අබාධ සහිත පුද්ගලයින් ආදර සම්බන්ධතා පැවැත්වීමේදී ඒ වටා පවතින ඍණාත්මක ඒකාකෘති සහ අපකීර්තිමත් තත්ත්වයට අභියෝග කිරීමට හඬ නැගූ ආබාධ සහිත කාන්තාවන් ගණනාවකින් කෙනෙකි.
ආබාධ සහිත පුද්ගලයින්ට ද ප්‍රීතිමත් සබඳතා පැවැත්විය හැකි බව පෙන්වීම වැදගත් වූ බව හොලී ග්‍රීඩර් පවසයි.
දැන් ඇයගේ ස්වාමි පුරුෂයා වන ජේම්ස් සමග ඇය ආදර සම්බන්ධතාව ඇරඹියේ ඇය නව යොවුන් වියේ පසුවද්දී ය. වසර 9ක් පුරා පැවති සම්බන්ධතාවකින් අනතුරුව ඇය මෙම වසරේ මුල ඔහු සමග විවාහ වූවා ය.
“මාධ්‍යවල ගොඩක් වෙලාවට පෙන්නන්නේ, ආබාධ සහිත පුද්ගලයින් දුක්ඛිත ජීවිත ගත කරනවා කියලා, අපි තවත් එක දුක්බර කතාවක් කියලා,” ඇය පැවසුවා ය.
ඇය තවදුරටත් සඳහන් කළේ, ඔහුගෙන් සහයක් ලැබෙන බව ඇයට සැමවිට ම දැනුණු නමුත් අන් අය විසින් ඔවුන්ගේ විශ්වාසයන් මත පදනම් ව තමන් පිළිබඳව අසාධාරණ තීන්දු ගනු ලබන බවට දැනුණු බව ත් ය.
“අපි මුලින් ම එකට ජීවත් වෙන්න ගියා ම, මට මිනිස්සු කිව්වා මගේ සෞඛ්‍ය තත්ත්වය නරක් උනා ම එයා මාව දාලා යාවි කියලා.
“වදයක් වෙලා, බලා ගන්න බැරි තැනට පත් වුණා ම.”
පාසැලේදී ඇය ගැන විවිධ පිරිස් උපකල්පනවලට එළඹි බවත් ඔවුන් ඇතැම් ඒවා ඇයගෙන් ඍජුව ම විමසා සිටි බව ත් ඇය පැවසීය.
“රෝද පුටුවක් පාවිච්චි කරන කෙනෙක් ගත්තා ම, සැකයක් නැහැ, මුලින් ම අහන ප්‍රශ්නය තමයි, ඒ මනුස්සයට සෙක්ස් කරන්න පුළුවන් ද? කියන එක.”
පාසැලේ ඇගේ පන්තියේ සිටි පිරිමි ළමයින් පෞද්ගලික හා අනවශ්‍ය ප්‍රශ්න ඇසූ බව ඇය පැවසුවා ය.
“මගෙන් ඇහුවා, ඔයාට රෝද පුටුවේ විතරක් ඉඳන් සෙක්ස් කරන්න පුළුවන් ද? වගේ ප්‍රශ්න. ඔයාගේ ජොයින්ට්ස් පනීවි ද? මට ඔයත් එක්ක රෆ් සෙක්ස් කරන්න ඕනේ නම්, ඔයාට ඒක කරන්න පුළුවන් වේවි ද?
හොලී පැවසුවේ, ‘සෙක්ස්’ පිළිබඳව ඇයට සමාජ මාධ්‍ය හරහා පවා ඇතැම් පුද්ගලයින් පණිවිඩ එවා ඇති බව ත් එවැනි ඇරයුමක් කිරීම පිළිබඳව ඇයට තමන් “වාසනාවන්ත” යැයි හැඟිය යුතු බව නිරතරයෙන් පැවසූ බව ත් ය.
මාධ්‍ය තුළ වඩා හොඳ ධනාත්මක නියෝජනයක් දැකීමට හොලී කැමැත්තක් දක්වන බව පවසන්නේ Sex Educationහි අයිසැක් ගුඩ්වින් ඒ සඳහා ඇය දන්නා එක ම හොඳ උදාහරණය බව පෙන්වා දෙමිනි.
කාර්ෆිලිහි පදිංචි 38 හැවිරිදි නිකොලා තෝමස්, අන්ධ කාන්තාවක් ලෙස නීත්‍යනුකූලව හඳුනා ගත් අයෙකි.
ඇය මෙසේ පැවසුවා ය: “මිනිස්සු නිතර අහන දෙයක් තමයි, ඔයා කොහොම ද සෙක්ස් කරන්නේ? ඒක නිකම් හුස්ම නතර කරනවා වගේ ප්‍රශ්නයක්. ආක්‍රමණශීලි සහ පෞද්ගලික ප්‍රශ්නයක්.”
නිකොලා නියුරොමයිලයිටිස් ඔප්ටිකා නමැති ස්වයං ප්‍රතිශක්තිකරණ රෝගයකින් පෙළෙයි. ඇයට වසර 15කට පෙර එක් ඇසක පෙනීම අහිමි වූ අතර අනෙක් ඇසේ පෙනීම වසර පහකට පෙර අහිමි විය.
“ඇස් නොපෙනීම බාධකයක් විදිහට ගොඩක් අය දකිනවා. අනිවාර්යයෙන් ම මම ඒවා බිඳලා දාන්න පුළුවන් කෙනෙක්.”
නිකොලාගේ විනෝදාංශවලට මුහුදේ යාත්‍රා කිරීම, පැඩ්ල්බෝඩින් සහ සංචාරය කිරීම ඇතුළත් වේ. ඇගේ මීළඟ සංචාරය හොංකොං වෙතයි.
පෙනීම අහිමි වන මොහොතේ නිකොලාට පෙම්වතෙකු සිටි නමුත් එම සම්බන්ධතාවය බිඳ වැටිණි.
“මට සැලකුවේ මාව මහ බරක් වගේ, මිනිස්සු කිව්වා ඔයාට එයාව බලාගන්න කෙනෙක් වෙන්න බෑ කියලා, ඒත් මට බලාගන්න කෙනෙක් ඕන වුණේ නැහැ.”
ඇයට දැන් දෘෂ්‍යාබාධිත පෙම්වතෙකු සිටී.
“අපි දෙන්න ම අන්ධ වුණත්, මග හොයා ගෙන නගරය පුරා යනවා, එහෙම නැත්නම් ඩෙට් එකකට යනවා. කිසි දේකට අපිව නවත්තන්න බැහැ.”
මිනිසුන් ඇය කෙරෙහි උනන්දුවක් දක්වන විට තමාට ඒකාකෘතික හැඟීමක් ඇති වන බව නිකොලා පැවසීය.
“මිනිස්සු මට සෝෂල් මීඩියාවලින් මැසේජ් කරලා හමුවෙන්න අහනවා. එයාලගේ අවධානය වෙනස් වෙනවා, නැත්නම් හැසිරීම වෙනස් වෙනවා, මගේ ඇස් පේන්නේ නෑ කියලා මම එයාලට කිව්වා ම.”
“එයාලා උව්වක් කරනවා කරනවා වගේ තමයි සලකන්නේ. එතනින් ම එපා වෙනවා.”
නිකොලා මෙසේ ද පැවසීය: “මිනිස්සු අපි දිහා පටු විදිහට බලන්නේ. මට අන්න එක බිඳලා දාන්න ඕනේ. මට පරිපූර්ණ සහ ප්‍රීතිමත් ජීවිතයක් තියෙනවා.”
කැට් වොට්කින්ස් පැවසුවේ, ආබාධ සහිත පුද්ගලයින්ට ඔවුන්ගේ ලිංගික අනන්‍යතාවය සොයා යාමට සහ වෙනත් ඕනෑ ම කෙනෙකුට මෙන් සබඳතා පැවැත්වීමට ගැනීමට අයිතියක් ඇති බව ය.
ඇය Disability Wales සංවිධානයේ දේශපාලන ව්‍යාපෘති නිලධාරිනිය ලෙස කටයුතු කරයි.
“ඇයි සෙක්ස් සහ සබඳතා ආබාධ සහිත අයට තහනම් දෙයක් වෙලා තියෙන්නේ? ආහාර ගන්න පුළුවන් වෙන එක සහ හිසට වහලක් තියෙන එකට වඩා ගොඩක් වටින දේවල් අපිට තියෙනවා.”
“ජීවිතය ගත කිරීම සහ සතුට භුක්ති විඳින ඒක ජීවිතේ එක කොටසක් විතරයි. අබාධ තියෙන අයගේ ජීවිතවල ඒ කොටස ගැන අවධානයට ලක් වෙන්නේ නැහැ.”
කැට් පැවසුවේ ආබාධිත කාන්තාවන් වෙත මිනිසුන් යොමු කරන පණිවිඩ, “කනගාටුදායක ලෙස සාමාන්‍යකරණය වී” ඈති බව ය.
අවශ්‍ය පරිදි සකසා ගත හැකි සෙක්ස් ටෝයිස් සහ උපකරණ මිනිසුන්ට විශ්වාසයක් ලබා දිය හැකි බවත් ඒවා ව ඩාත් ප්‍රධාන ධාරාවේ සෙක්ස් සම්බන්ධ වෙබ් අඩවි සහ අලෙවිසැල්වල දැකීමට කැමති බවත් ඇය පැවසුවා ය.
“ඔබට ඔබව පහසුවක් වෙන්න ඕන සහ ඔබ ඔබේ ශරීරය තේරුම් ගන්න ඕනේ. ඊට පස්සේ ඒක සාර්ථක ද කියලා ඔයාට අනිත් අයට කියන්න පුළුවන්. ස්වයං ආදරය ද ඉතා වැදගත්.”
උපුටා ගැනීම – බී.බී.සී සන්දේශය වෙබ් අඩවිය
