අනුරාධපුර ශික්ෂණ රෝහලේ වෛද්යවරියක බරපතළ ලෙස ලිංගික අපරාධයකට ලක් කිරීමේ සිද්ධියේ සැකකාර හිටපු යුද්ධ හමුදා සෙබළා හඳුනා ගැනීමේ පෙරෙට්ටුවේදී පහසුවෙන් හඳුනා ගැනීමට පැමිණිලිකාර වෛද්යවරිය සමත් වූවා ය.
සැකකරු මෙලෙස හඳුනා ගනු ලැබුවේ, සැකකරු හඳුනා ගැනීමේ පෙරට්ටුව අනුරාධපුර ප්රධාන මහේස්ත්රාත් නාලක සංජීව ජයසූරිය ඉදිරියේ සිකුරාදා (මාර්තු 28) පැවති අවස්ථාවේදී ය.
මෙම හඳුනා ගැනීමේ පෙරෙට්ටුව මහේස්ත්රාත් නිල මැදිරියේදී පැවැත්විණි.
සැකකරු වෙනුවෙන් අද දිනයේදී ද කිසිදු නීතිඥයෙකු පෙනී සිටියේ නැත.
පැමිණිල්ල ඉදිරිපත් කළ වෛද්යවරිය, හඳුනා ගැනීමේ පෙරෙට්ටුවට පෙනී සිටීම සඳහා ජනාධිපති නීතිඥ කාලිංග ඉන්ද්රතිස්ස ඇතුළු නීතිඥ කණ්ඩායමක් සමග අනුරාධපුර ප්රධාන මහේස්ත්රාත් අධිකරණයට පැමිණ සිටියා ය.
සැකකරු හඳුනා ගැනීමේ පෙරෙට්ටුව මහෙස්ත්රාත් නිල මැදිරියේදී පැවැත්වීමෙන් අනතුරුව නඩුව යළි විවෘත අධිකරණයේදී කැඳවනු ලැබී ය.
එහිදී, මෙම සිද්ධිය සම්බන්ධයෙන් වැඩිදුර වාර්තාවක් ඉදිරිපත් කරමින් අනුරාධපුර මූලස්ථාන පොලිසියේ ළමා හා කාන්තා කාර්යාංශය ඉල්ලා සිටියේ, මෙම අපරාධ සිද්ධිය සම්බන්ධයෙන් තවදුරටත් විමර්ශන සිදු කෙරෙන බැවින් සැකකරු යළි රක්ෂිත බන්ධනාගාරගත කරන ලෙස ය.
පොලිසිය කළ එම ඉල්ලීම පිළිගත් අනුරාධපුර ප්රධාන මහේස්ත්රාත් නාලක සංජීව ජයසූරිය නියෝග කළේ, සැකකරු තවදුරටත් අපේල් මස 10 වන දා දක්වා රක්ෂිත බන්ධනාගාරගත කරන ලෙස ය.
එහිදී, අනුරාධපුර ප්රධාන මහේස්ත්රාත්වරයා අමතමින් සැකකරු පවසා සිටියේ, මෙම සිද්ධිය සම්බන්ධයෙන් රහස් ප්රකාශයක් ලබා දීමට තමන්ට අවශ්ය බැවින් ඒ සඳහා අවසර ලබා දෙන ලෙස ය.
සැකකරුගේ මෙම ඉල්ලීමට ප්රතිචාර දක්වමින් ප්රධාන මහේස්ත්රාත්වරයා පැවසුවේ, මානසික රෝග විශේෂඥ වෛද්යවරයෙකුගෙන් සැකකරු සම්බන්ධයෙන් වෛද්ය වාර්තාවක් කැඳවීමෙන් අනතුරුව සැකකරුගේ ඉල්ලීම පිළිබඳව සලකා බැලිය හැකි බව ය. ඒ අනුව, සැකකරු අනුරාධපුර ශික්ෂණ රෝහලේ මානසික රෝග විශේෂඥ වෛද්යවරයෙකු හමුවට ඉදිරිපත් කොට, අදාළ වෛද්ය වාර්තාව අධිකරණය හමුවට ඉදිරිපත් කරන ලෙසට ද ප්රධාන මහේස්ත්රාත්වරයා අනුරාධපුර මූලස්ථාන පොලිසියට තවදුරටත් නියෝග කළේ ය.
මෙසේ යළි රිමාන්ඞ් භාරයට පත් කළේ ගල්නෑව ප්රදේශයේ පදිංචි හිටපු යුද්ධ හමුදා සෙබළෙකු මෙන් ම හිටපු චීවරධාරියකි.
අනුරාධපුර ශික්ෂණ රෝහලේ සේවයේ නිරතව සිටි වෛද්යවරියක බරපතළ ලෙස දූෂණය කිරීමේ සිද්ධිය සම්බන්ධයෙන් චෝදනා ලබා රිමාන්ඩ් බන්ධනාගාරගත කර සිටින සැකකරුගේ නිවසේ පාත්තරයක් තුළ තිබී, ජීව බෝම්බයක් පොලිසිය විසින් සොයා ගැනුණු අතර, එම ජීව අත්බෝම්බය අධිකරණ නියෝග මත පොලිස් විශේෂ කාර්ය බළකාය විසින් පුපුරවා විනාශ කර හැරිණි.
source: bbc.com/sinhala
