ජනප්රිය බොලිවුඩ් නළු සෙයිෆ් අලි ඛාන් මුම්බායිහි පිහිටි ඔහුගේ නිවසේදී පිහි ප්රහාරයකට ලක්ව රෝහල්ගත කර තිබේ. නිවසට ඇතුළු වූ පුද්ගලයෙකු ඔහුට මෙම ප්රහාරය එල්ල කර ඇතැයි වාර්තා වේ.
බ්රහස්පතින්දා (ජන:16) අලුයම මෙම ප්රහාරය සිදු වූයේ ඛාන් සිය පවුලේ සාමාජිකයින් සමග වෙසෙන මුම්බායි නගරයට ආසන්න ප්රදේශයක පිහිටි නිවසක් තුළ ය.
මධ්යම රාත්රියෙන් පසු ඔහුගේ නිවසට ඇතුළු වූ නාඳුනන පුද්ගලයෙකු සහ ඔහු අතර ඇති වූ ගැටුමක් අතරතුර සෙයිෆ් අලි ඛාන් තුවාල ලබා ඇතැයි මුම්බායි නාගරික පොලිසිය බීබීසී මරාති සේවයට පැවසීය.
ඛාන්ගේ පවුලේ සාමාජිකයින් ඒ පිළිබඳව කිසිදු ප්රසිද්ධ ප්රකාශයක් කර නොමැති නමුත් ඔහුගේ ප්රචාරක කණ්ඩායම පැවසුවේ, එය “සොරකමක් කිරීමට තැත් කිරීමක්” බව ය.
සෙයිෆ් අලි ඛාන් මුම්බායිහි ලීලාවතී රෝහල වෙත රැගෙන ගොස් ඇති අතර, එහිදී ඔහු ශල්යකර්මයකට භාජනය කර තිබේ.
එම රෝහලේ ප්රධාන මෙහෙයුම් නිලධාරී නීරජ් උත්තමානි බීබීසී මරාති සේවයට පැවසුවේ, සෙයිෆ් අලි ඛාන්ට පිහි පහර 6ක් එල්ල වී ඇති අතර, ඉන් දෙකක් ගැඹුරු තුවාල සහිත ඒවා බව ය.
“එක පිහි පහරක් කොඳු ඇට පෙළට ළඟින් ම එල්ල වෙලා. ඔහුට විශේෂඥ වෛද්යවරුන් ශල්යකර්මයක් කළා,” ඔහු පැවසීය.
පොලිසිය මේ සම්බන්ධයෙන් විමර්ශනයක් ආරම්භ කර තිබේ.
“රංගන ශිල්පියාගේ නිවසට නාඳුනන පුද්ගලයෙක් ඇතුළු වෙලා. ඊට පස්සේ නළුවා සහ ඒ පුද්ගලයා අතර බහින්බස් වීමක් ඇති වෙලා,” මුම්බායි පොලිසියේ නියෝජ්ය කොමසාරිස් ඩික්සිට් ගෙදාම් පැවසීය.
සෙයිෆ් අලි ඛාන් නියෝජනය කරමින් බ්රහස්පතින්දා පෙරවරුවේ නිකුත් කළ නිවේදනයක දැක්වුණේ, ඔහුගේ පෞද්ගලිකත්වයට ගරු කරන ලෙස රසිකයින්ගෙන් ඉල්ලා සිටින බව ය.
“මාධ්යවලින් සහ රසිකයින්ගෙන් අපි ඉල්ලා සිටිනවා, ඉවසීමෙන් කටයුතු කරන ලෙස. ඒක දැන් තිබෙන්නේ, පොලිසිය භාරයේ. අපට ලැබෙන තොරතුරු අපි ඉදිරිපත් කරනවා,” එහි සඳහන් විය.
සෙයිෆ් අලි ඛාන්ට සිදුකළ ශල්යකර්මය සාර්ථක බව ඔහුගේ පවුලේ සාමාජිකයින් මාධ්ය වෙත දැනුම් දී තිබේ.
ඔවුන් පවසා ඇත්තේ, ශල්යකර්මයෙන් පසු ඔහුගේ ජීවිත අවදානම පහව ගොස් ඇති බව ය.
ඔහු සුවය ලබමින් සිටින බවත්, වෛද්යවරුන් ඔහුගේ තත්ත්වය නිරීක්ෂණය කරමින් සිටින බවත් ඔවුහු පවසති.
source: bbc.com
