අත්යාවශ්ය ආහාර ද්රව්ය ඇතුළු තෝරාගත් ද්රව්ය 63ක් සඳහා දැනට පවතින ආනයන බද්ද කිසිදු සංශෝධනයකින් තොරව පවත්වාගෙන යාමට අදාළ ගැසට් නිවේදනය 2024 දෙසැම්බර් 31 වැනි දින නිකුත් කර ඇති බව මුදල්, ක්රමසම්පාදන හා ආර්ථික සංවර්ධන අමාත්යාංශය නිවේදනය කරයි.
පරිප්පු, සුදු සීනි, අල, ලොකු ළූණු, රතුළූණු, පොල්තෙල්, එළවළු තෙල්, ටින් මාළු සහ වියළි මිරිස් වැනි ද්රව්යවල දැනට පවතින මිල ගණන් එලෙසම පවත්වා ගනිමින් භාණ්ඩවල මිල වැඩිවීම වැළැක්වීම දැනට පවතින තීරු බදු අනුපාත අඛණ්ඩව පවත්වා ගෙන යාමේ අරමුණ බව අමාත්යාංශය පවසයි.
මීට අමතරව සහල්, මෙනේරි, මුං ඇට, බඩඉරිඟු, කහ, පලතුරු, මාළු සහ කරවල වැනි ආහාර ද්රව්ය සඳහා ද පනවා තිබූ බදු අනුපාත තවදුරටත් එලෙස ම රඳවා ගත් බව අමාත්යාංශය සඳහන් කළේය. මෙම පියවර දේශීය කෘෂිකර්මාන්තය සහ ධීවර කර්මාන්තය ආරක්ෂා කිරීම අරමුණු කර ගෙන ඇත.
