වත්මන් රජය සමෘද්ධිමත් රටක් සහ යහපත් ජීවිතයක් ගොඩනැගීමට පොරොන්දු වෙමින් බලයට පත් වුව ද විදුලි බිල ඉහළ දැමීමෙන් දුප්පත් රටකට සහ කටුක ජීවිතයකට අඩිතාලම දමමින් සිටින බව විශේෂ වීඩියෝ පණිවිඩයක් නිකුත් කරමින් විපක්ෂ නායක සජිත් ප්රේමදාස මහතා චෝදනා කළේය.
33%කින් විදුලි බිල්පත් අඩු කිරීමේ පොරොන්දුව නිසා මිලියන සංඛ්යාත පුරවැසියන් වත්මන් රජයට ඡන්දය දුන් බව පෙන්වා දුන් විපක්ෂ නායකවරයා එය ජනාධිපතිවරයා විසින් ප්රසිද්ධියේ ප්රකාශ කරන ලද පොරොන්දුවක් බව ද කීවේය.
මේ ආකාරයෙන් තම ජනවරම උල්ලංඝනය කරන රජයකට එරෙහිව ජනතාව පෙළ ගැසිය යුතු බවත්, පුරවැසියන් මත දරාගත නොහැකි පීඩනයක් එල්ල කරන මෙවැනි ජනතා විරෝධී ක්රියාවන් හෙළා දකින බවත් සජිත් ප්රේමදාස මහතා දැඩිව අවධාරණය කළේය.
දිට්වා සුළි කුණාටුවෙන් මිලියන සංඛ්යාත ජනතාවක් අවතැන් වී සිටින අතර, රජය විදුලි ගාස්තු 11.57%කින් වැඩි කිරීමට සූදානම් වන බව ද විපක්ෂ නායකවරයා පැවසුවේය.
මැතිවරණ සමයේ දී වත්මන් ජනාධිපතිවරයා ඇතුළු කථිකයින් සෑම වේදිකාවකදීම විදුලි බිල්පත් 33%කින් අඩු කිරීමට පොරොන්දු වූ බවත් සිහිපත් කළ සජබ නායකයා මාළිමාව බලයට පත්වීමෙන් පසු ඔවුන් එම පොරොන්දු අමතක කර 11.57%කින් ගාස්තු වැඩි කිරීමට සැලසුම් කරමින් සිටින බවත්, ඔවුන්ට ලැබුණු මහජන ජනවරම පාවා දෙන බවත් පෙන්වා දුන්නේය.
ප්රේමදාස මහතා ජනතා විමුක්ති පෙරමුණ විවේචනය කරමින් කියා සිටියේ, ජනතාවට ප්රතිලාභ සැලසීම සඳහා ජාත්යන්තර මූල්ය අරමුදලේ කොන්දේසි නැවත සාකච්ඡා කරන බව වරක් ප්රකාශ කළ ද ඔවුන් ද දැන් ජාත්යන්තර මූල්ය අරමුදලේ ගිවිසුම් නොවෙනස්ව ක්රියාත්මක කරමින් සිටින බවත් එමඟින් මහජනතාව මත අසීමිත දුෂ්කරතා සහ පීඩනය පටවන බවත්ය.
